‘ಸಿರಿಮನೆ’ಯ ಸೌಂದರ್ಯ


ಶೃಂಗೇರಿಯಿಂದ 17 ಕಿ.ಮೀ ದೂರದಲ್ಲಿರುವ ‘ಸಿರಿಮನೆ’ ಜಲಪಾತ ವರ್ಷಪೂರ್ತಿ ಧುಮ್ಮಿಕ್ಕಿ ಹರಿಯುತ್ತದೆ. ಧುಮ್ಮಿಕ್ಕಿ ಹರಿಯುವ ಜಲಧಾರೆಗೆ ಮೈಯೊಡ್ಡಿದರೆ ಅದರ ಆನಂದ ಅನುಭವಿಸಿದವನೇ ಬಲ್ಲ.  ಮೊನ್ನೆ ಇದೇ ಜಲಪಾತ ವೀಕ್ಷಣೆಗೆ ಕುಟುಂಬ ಸಮೇತ ಭೇಟಿ ನೀಡಿದೆ. ಒಂದೂವರೆ ಗಂಟೆಗಳ ಕಾಲ ಜಲಪಾತದ ಸೌಂದರ್ಯವನ್ನು ಕಣ್ತುಂಬಿಕೊಂಡೆ. ಗೆಳೆಯರಿಗೂ ಹಂಚೋಣವೆಂದು ಕ್ಯಾಮೆರಾದಲ್ಲಿ ಆ ಸೌಂದರ್ಯವನ್ನು ಸೆರೆ ಹಿಡಿದಿದ್ದೇನೆ.

'ಸಿರಿಮನೆ' ಜಲಪಾತಕ್ಕೆ ಹೋಗುವ ಹಾದಿ
ಧುಮ್ಮಿಕ್ಕಿ ಹರಿಯುವ ಜಲಧಾರೆಯಲ್ಲೋ...
ಗಿಡಗಳ ಮರೆಯಿಂದ ಕಂಡ ಸೊಬಗು
ಹಾಲ್ನೊರೆಯಂತಹ ಸೊಬಗು
ಇದೇ ಸಿರಿಮನೆ ಜಲಪಾತದ ಸೌಂದರ್ಯದ ಮೂಲ.

ಪಶ್ಚಿಮಘಟ್ಟಗಳ ಜಲಪಾತಗಳಪಟ್ಟಿಯಲ್ಲಿ ಸಿರಿಮನೆ ಜಲಪಾತಕ್ಕೂ ಸ್ಥಾನವಿದೆ. ಸಿರಿಮನೆ – ಮನೆತನದ ಹೆಸರು. ಜಲಪಾತದ ಸಮೀಪ ಈ ಮನೆತನದ ಹನ್ನೊಂದು ಮನೆಗಳಿವೆ. ಹಾಗಾಗಿ ಈ ಜಲಪಾತಕ್ಕೆ ‘ಸಿರಿಮನೆ’ ಎಂಬ ಹೆಸರಿದೆ.

ತಲುಪುವ ಬಗೆ:

ಶೃಂಗೇರಿಯಿಂದ ಕಿಗ್ಗ ಮಾರ್ಗವಾಗಿ ಸಿರಿಮನೆ ಜಲಪಾತ ತಲುಪಬಹುದು. ಬಸ್ಸುಗಳ ಸಂಖ್ಯೆ ವಿರಳ. ಕಿಗ್ಗ ವರೆಗೂ ಬಸ್ ಸೌಲಭ್ಯವಿದೆ. ನಂತರ ‘ನಟರಾಜಾ ಮೋಟಾರ್ ಸರ್ವೀಸ್’ ಅಂದರೆ ಕಾಲ್ನೆಡಿಗೆಯನ್ನೇ ಆಶ್ರಯಿಸಬೇಕು. ಸ್ವಂತ ವಾಹನವಿದ್ದರೆ ಆಯಾಸವಿಲ್ಲದ ಪ್ರವಾಸ.

ಪುಟ್ಟದಾದ ಜಲಪಾತವಾದರೂ, ಮಕ್ಕಳಿಗೆ ಇಷ್ಟವಾಗುವ ಸ್ಥಳ. ಏಕೆಂದರೆ ಆಳವಾದ ನೀರಿನಲ್ಲ. ಕೊಚ್ಚಿ ಹೋಗುವಷ್ಟು ರಭಸವೂ ಅಲ್ಲ.  ದೊಡ್ಡವರಿಗೆ ದೊಡ್ಡದಾದ ಜಲಧಾರೆ, ಮಕ್ಕಳಿಗೆ ಪುಟ್ಟ ಜಲಧಾರೆ.  ಒಂದು ಅಪಾಯವೆಂದರೆ, ಪಾಚಿಕಟ್ಟಿರುವ ಕಲ್ಲುಗಳು. ಕಾಲಿಡುವಾಗ ಎಚ್ಚರವಿರದಿದ್ದರೆ ಮೈ ಮೂಳೆ ಮುರಿಯುವುದು ಖಚಿತ. ಇದೊಂದು ಎಚ್ಚರಿಕೆಯಿದ್ದರೆ ಉಳಿದಿದ್ದೆಲ್ಲ ಸುಸೂತ್ರ.

ಮಳೆಗಾಲ ಮುಗಿದ ಕೂಡಲೇ ಜಲಪಾತ ನೋಡಲು ಹೊರಡಬೇಕು. ಆಗ ಸಿರಿಮನೆ ಜಲಪಾತದ ಜೊತೆಗೆ ಮೈತೊಳೆದುಕೊಂಡ ನಿಂತ ಪಶ್ಚಿಮಘಟ್ಟಗಳ ಸಾಲು, ಭತ್ತದ ಗದ್ದೆಗಳಲ್ಲಿ ನಾಟಿಯ ಸಂಭ್ರಮ, ಮರಗಳಲ್ಲಿ ತೊಟ್ಟಿಕ್ಕುವ ಹನಿಗಳು.. ಎಳೆ ಬಿಸಿಲನ ಅಹ್ಲಾದಕರ ವಾತಾವರಣ ಇವೆಲ್ಲ ಬೋನಸ್…

ಮತ್ತೊಂದು ವಿಶೇಷ:

ಹೀಗೆ ಧುಮ್ಮಿಕ್ಕಿ ಹರಿಯುವ ಜಲಧಾರೆಗೆ ಟರ್ಬನ್ ಅಳವಡಿಸಿ ವಿದ್ಯುತ್ ತಯಾರಿಸುತ್ತಾರೆ. (ಹೈಡ್ರೋ ಎಲೆಕ್ಟ್ರಿಕ್).  ಸಿರಿಮನೆಯ ಹನ್ನೊಂದು ಮನೆಗಳಿಗೆ ಈ ವಿದ್ಯುತ್ ಬಳಕೆಯಾಗುತ್ತಿದೆ. ಅಚ್ಹುತ ರಾವ್ ಎಂಬುವವರ ನಾಯಕತ್ವದಲ್ಲಿ ಇದು ಚಾಲ್ತಿಯಲ್ಲಿದೆ. ಕಳೆದ ಹದಿನಾರು ವರ್ಷಗಳಿಂದ ಜಲವಿದ್ಯುತ್  ಉತ್ಪಾದನೆಯಾಗುತ್ತಿದೆ. ಕಳೆದ ಕೆಲವು ವರ್ಷಗಳಿಂದ ಅರಣ್ಯ ಇಲಾಖೆ ಈ ಜಲಪಾತದ  ಉಸ್ತುವಾರಿ ನೋಡಿಕೊಳ್ಳುತ್ತಿದೆ.

ಬೇಸರದ ಸಂಗತಿ:

ಬಹಳ ಬೇಸರದ ಸಂಗತಿ ಎಂದರೆ, ಇಂಥ ಅದ್ಭುತ ರಮಣೀಯ ಸ್ಥಳವನ್ನು ಪ್ರವಾಸಿಗರು ಪ್ಲಾಸ್ಟಿಕ್ ತ್ಯಾಜ್ಯಗಳಿಂದ ಮಲಿನಗೊಳಿಸಿದ್ದಾರೆ. ಬೀಡಿ-ಸಿಗರೇಟು, ಜರ್ದಾ ಪ್ಯಾಕೆಟ್ಟು.. ಹೀಗೆ ಹೊಲಸೆಂದು ಹೇಳುವ ಎಲ್ಲ ವಸ್ತುಗಳೂ ಅಲ್ಲಲ್ಲಿ ಚಲ್ಲಾಪಿಲ್ಲಿಯಾಗಿ ಬಿದ್ದಿವೆ.  ‘ಕಸ ಹಾಕಬೇಡಿ’ ಎಂಬ ನಾಮಫಲಕಗಳಿದ್ದರೂ ಅದನ್ನು ಓದಿ ಅನುಸರಿಸುವವರ ಸಂಖ್ಯೆ ತೀರಾ ವಿರಳವಾಗಿದೆ.

ಸಿರಿಮನೆಗೆ ಹೊರಟಿದ್ದು…

ಸಿರಿಮನೆ ಹೆಸರು ಕೇಳಿದ್ದೆ. ಆದರೆ ನೋಡಲು ಸಾಧ್ಯವಾಗಿರಲಿಲ್ಲ.  ಈ ಬಾರಿ ಶೃಂಗೇರಿಯಲ್ಲಿ  ಇಂದ್ರಾ ಹಾಗೂ ಚಂದ್ರಶೇಖರ್  ದಂಪತಿ ಪರಿಚಯವಾಯ್ತು. ಅವರು ನಮ್ಮ ಸಂಬಂಧಿಯೂ ಹೌದು.  ಹೀಗೆ ಮಾತಿಗೆ ಕುಳಿತಾಗ ಸಿರಿಮನೆಯ ವೃತ್ತಾಂತ ವಿವರಿಸಿದರು. ಋಷ್ಯಶೃಂಗ ಪರ್ವತ, ನರಸಿಂಹ ಪರ್ವತಗಳ ಹಿಂದಿನ ಪುರಾಣ ಕಥೆಗಳನ್ನು ಹೇಳಿದರು.  ಕಥೆ ಕೇಳಿ ಖುಷಿಯಾಯ್ತು. ಸಂಜೆ ಜಲಪಾತ ನೋಡವ ಯೋಜನೆ ಸಿದ್ಧವಾಯಿತು. ಅವರ ಜೊತೆಯಲ್ಲೇ ಜಲಪಾತಕ್ಕೆ ಹೊರಟೆವು. ಇಂಥದ್ದೊಂದು ಪ್ರಕೃತಿ ಸಿರಿಯನ್ನು ಪರಿಚಯರಿಸಿದ ಇಂದ್ರಾ-ಚಂದ್ರಶೇಖರ್ ದಂಪತಿಗೆ ನಾವೆಂದೂ ಅಭಾರಿಯಾಗಿದ್ದೇವೆ.

Published by

ಗಾಣಧಾಳು ಶ್ರೀಕಂಠ

ಹುಟ್ಟೂರು ಗಾಣಧಾಳು. ಓದಿದ್ದು ತಿಪಟೂರು. ಕೆಲಸ ಮಾಡ್ತಿರೋದು ಬೆಂಗಳೂರು. ವೃತ್ತಿಯಲ್ಲಿ ಪತ್ರರ್ತ, ಆಸಕ್ತಿ ಕೃಷಿ-ಗ್ರಾಮೀಣಾಬಿವೃದ್ದಿ ಮತ್ತು ಪರಿಸರ. ಫೋಟೋಗ್ರಫಿ, ಪುಟ ವಿನ್ಯಾಸ, ಪ್ರವಾಸ ಹವ್ಯಾಸ. ರಮಾ ಬಾಳಸಂಗಾತಿ. ಆಕೆಯೂ ಹವ್ಯಾಸಿ ಬರಹಗಾರ್ತಿ. ಸ್ಪೈಸ್ ಇಂಡಿಯಾ ಕನ್ನಡ ಮಾಸ ಪತ್ರಿಕೆಯಲ್ಲಿ ಆರು ವರ್ಷ ಸಹಾಯಕ ಸಂಪಾದಕಿ (ಎಡಿಟೋರಿಯಲ್ ಅಸಿಸ್ಟೆಂಟ್) ಕೆಲಸ ಮಾಡಿದ್ದಾರೆ. ಸದ್ಯ ಚಿತ್ರದುರ್ಗ ಆಕಾಶವಾಣಿ ಕೇಂದ್ರದಲ್ಲಿ ಗೌರವ ಉದ್ಘೋಷಕಿ, ಮಗಳು ನದಿ ನನ್ನ ಬದುಕು, ಮಗ ಅಗರ್ತ, ನನ್ನ ಭವಿಷ್ಯ. ನಿವೃತ್ತ ಶಿಕ್ಷಕ ತಂದೆ ಗಾಣಧಾಳು ರಾಮಣ್ಣ ಅವರೊಂದಿಗೆ ವರ್ಗವಾದ ಕಡೆ ವಾಸ್ತವ್ಯ. ಸದ್ಯ ಚಿತ್ರದುರ್ಗದಲ್ಲಿ ವಾಸ. ಸಮಾಜಶಾಸ್ತ್ರ ಮತ್ತು ಸಮೂಹ ಸಂವಹನ ಮತ್ತು ಪತ್ರಿಕೋದ್ಯಮದಲ್ಲಿ ಸ್ನಾತಕೋತ್ತರ ಪದವಿ. ಕಾಲೇಜು ದಿನಗಳಲ್ಲೇ ಪತ್ರಿಕೆಗಳಿಗೆ ಲೇಖನ ಬರೆಯುವ ಹವ್ಯಾಸ. ಪ್ರಜಾಪ್ರಗತಿ, ಉದಯವಾಣಿ ಪತ್ರಿಕೆಗಳಿಗೆ ಅರೆಕಾಲಿಕ ವರದಿಗಾರನಾಗಿ ಸೇವೆ. ೧೯೯೬ರಿಂದ ತಿಪಟೂರಿನ ಬೈಫ್ ಗ್ರಾಮೀಣ ಅಭಿವೃದ್ಧಿ ಸಂಸ್ಥೆಯಲ್ಲಿ ದಾಖಲಾತಿಗಾರನಾಗಿ ವೃತ್ತಿ ಆರಂಭ. ಕ್ರಮೇಣ, ಅದೇ ಸಂಸ್ಥೆಯ ಪ್ರಕಾಶನದ ಸಿರಿಸಮೃದ್ಧಿ ಕೃಷಿ ಮಾಸಪತ್ರಿಕೆಯಲ್ಲಿ ಉಪ ಸಂಪಾದಕನಾಗಿ ಸೇವೆ ಮುಂದುವರಿಕೆ. ೨೦೦೨ರಿಂದ ವಿಜಯ ಕರ್ನಾಟಕ ದಿನಪತ್ರಿಕೆಯ ಚಿತ್ರದುರ್ಗ ಆವೃತ್ತಿಯಲ್ಲಿ ಉಪ ಸಂಪಾದಕನಾಗಿ ಸೇವೆ ಆರಂಭ. ೨೦೦೪ರಲ್ಲಿ ಇದೇ ಪತ್ರಿಕೆಯ ಕೃಷಿ ವಿಜಯ ಪುರವಣಿಯ ಮುಖ್ಯಸ್ಥನಾಗಿ ಬೆಂಗಳೂರಿನಲ್ಲಿ ಕಾರ್ಯ ನಿರ್ವಹಣೆ. ೨೦೦೬ರಿಂದ ಪ್ರಜಾವಾಣಿ ಪತ್ರಿಕೆಯ ಬೆಂಗಳೂರಿನ ಕಚೇರಿಯಲ್ಲಿ ವಿವಿಧ ವಿಭಾಗಗಳಲ್ಲಿ ಸೇವೆ. ಪ್ರಕಟಿತ ಕೃತಿಗಳು : ಆಕಾಶವಾಣಿಯಲ್ಲಿ ಪ್ರಸಾರವಾದ ನಾಟಿ ಬೀಜಗಳ ಪರಂಪರೆ ಕುರಿತ ಸರಣಿಯ ಅಕ್ಷರ ರೂಪದ ಕೃತಿ ‘ಬೀಜಸಂಪದ’ . ಸಾವಯವ ಕೃಷಿಕರ ಯಶೋಗಾಥೆಯ ಕೃತಿ ‘ಸಾವಯವ ಚಿತ್ತಾರ’, ‘ವೆಲ್ವೆಟ್ ಬೀನ್ಸ್ -ನೆಲಕ್ಕೆ ಜೀವ ತುಂಬುವ ಮ್ಯಾಜಿಕ್ ಬಳ್ಳಿ’, ‘ಸ್ಲೋಫುಡ್- ಸುಭೋಜನಾ ಸಾವಧಾನ’, ‘ದೇಸಿ ಕೃಷಿ ಉಪಕರಣಗಳು’, ‘ನೆಲಮೂಲ ಕೃಷಿಜ್ಞಾನ- ಮಲೆನಾಡ ದೇಸಿ ಕೃಷಿ ಪದ್ಧತಿಗಳು’, ‘ ಹಸಿರು ಹಾದಿ’, ‘ಅಜೋಲಾ-ಮೇವಿಗೂ ಸೈ ಗೊಬ್ಬರಕ್ಕೂ ಜೈ’, ‘ಸುಸ್ಥಿರ ತೋಟ ಮಾಡೋಣ ಬನ್ನಿ’ ಹಾಗೂ ‘ಹೊನ್ನಾರು - ಪರಿಸರ, ಕೃಷಿ ಮತ್ತು ಗ್ರಾಮೀಣಾಭಿವೃದ್ಧಿ ಚಿಂತನೆ’ ಕುರಿತ ಕೃತಿಗಳು ಪ್ರಕಟಗೊಂಡಿವೆ. ಪ್ರಶಸ್ತಿ ಪುರಸ್ಕಾರ ೨೦೦೬ರಲ್ಲಿ ಸಿಡಿಎಲ್ ಸಂಸ್ಥೆಯಿಂದ ‘ಕೆರೆ ಆಪೋಷಣ ಪುರಾಣ’ ಲೇಖನಕ್ಕೆ ರಾಜ್ಯಮಟ್ಟದ ‘ಚರಕ ಅಭಿವೃದ್ಧಿ ಪತ್ರಿಕೋದ್ಯಮ ಪ್ರಶಸ್ತಿ’. ಇದೇ ವರ್ಷ ಧಾರವಾಡದ ಕೃಷಿ ಮಾಧ್ಯಮ ಕೇಂದ್ರದಿಂದ ‘ವೆಲ್ವೆಟ್ ಬೀನ್ಸ್’ ಲೇಖನಕ್ಕಾಗಿ ‘ರಾಜ್ಯ ಮಟ್ಟದ ಉತ್ತಮ ಕೃಷಿ ಬರಹಗಾರ ಪ್ರಶಸ್ತಿ’. ‘ದೇಸಿ ಭತ್ತ ಭ್ರಹ್ಮ ನಟವರಸಾರಂಗಿ’ ಲೇಖನಕ್ಕಾಗಿ ೨೦೦೯ರಲ್ಲಿ ಮುರುಘಾಶ್ರೀ - ರಾಜ್ಯಮಟ್ಟದ ಅಭಿವೃದ್ಧಿ ಪತ್ರಿಕೋದ್ಯಮ ಪ್ರಶಸ್ತಿ, ೨೦೧೦-೧೧ನೇ ಸಾಲಿನ ‘ಉತ್ತಮ ವಿಜ್ಞಾನ ಲೇಖಕ ಪ್ರಶಸ್ತಿಗೆ ವೆಲ್ವೆಟ್ ಬೀನ್ಸ್ ಮತ್ತು ಸಾವಯವ ಚಿತ್ತಾರ ಪುಸ್ತಕಗಳ ಆಯ್ಕೆ. ೨೦೧೧ರಲ್ಲಿ ನವದೆಹಲಿಯ ಸೆಂಟರ್ ಫಾರ್ ಸೈನ್ಸ್ ಅಂಡ್ ಎನ್ವಿರಾನ್ಮೆಂಟ್(ಸಿಎಸ್ಇ) ಸಂಸ್ಥೆಯಿಂದ ‘ಜಲಮೂಲಗಳ ಅಧ್ಯಯನಕ್ಕಾಗಿ’ ೧೨ನೇ ಸಿಎಸ್ಇ ಫೆಲೋಷಿಪ್ ಗೌರವ. ೨೦೧೨ರ ಕರ್ನಾಟಕ ರಾಜ್ಯ ಕಾರ್ಯನಿರತ ಪತ್ರಕರ್ತರ ಸಂಘದಿಂದ ‘ಯಜಮಾನ್ ಶ್ರೀ ನಾರಾಯಣಪ್ಪ ಪ್ರಶಸ್ತಿ, ೨೦೧೧ನೇ ಸಾಲಿನಲ್ಲಿ ‘ಬೆಂಗಳೂರು ನಿರ್ಮಾತೃ ಕೆಂಪೇಗೌಡ ಪ್ರಶಸ್ತಿ ಪುರಸ್ಕಾರ ಹಾಗೂ ಪರಿಸರ ಪತ್ರಿಕೋದ್ಯಮದಲ್ಲಿನ ಎರಡು ದಶಕಗಳ ಗಣನೀಯ ಸೇವೆಯನ್ನು ಗುರುತಿಸಿರುವ ಕರ್ನಾಟಕ ಸರ್ಕಾರ ‘೨೦೧೪ನೇ ಸಾಲಿನ ರಾಜ್ಯಮಟ್ಟದ ‘ಪರಿಸರ ಪತ್ರಿಕೋದ್ಯಮ’ ಪ್ರಶಸ್ತಿ’ ನೀಡಿ ಗೌರವಿಸಿದೆ. ಅಧ್ಯಯನ ಪ್ರವಾಸ : ಕೃಷಿ ಅಧ್ಯಯನಕ್ಕಾಗಿ ೨೦೧೩ರಲ್ಲಿ ಅಮೆರಿಕದ ಕ್ಯಾಲಿಫೋರ್ನಿಯಾ ರಾಜ್ಯದ ಸ್ಯಾನ್ಫ್ರಾನ್ಸಿಸ್ಕೋಗೆ ಪ್ರವಾಸ. ಭಾರತದ ಚಂಡಿಗಡ, ಒರಿಸ್ಸಾ, ಬಿಹಾರ, ಆಂಧ್ರ, ತಮಿಳುನಾಡು ಸೇರಿದಂತೆ ಕೃಷಿ ಅಧ್ಯಯನಕ್ಕಾಗಿ ವಿವಿಧ ರಾಜ್ಯಗಳಲ್ಲಿ ಪ್ರವಾಸ.

One thought on “‘ಸಿರಿಮನೆ’ಯ ಸೌಂದರ್ಯ”

  1. ಶುಭಾಶಯ.
    ಈಚೆಗೆ ಇಂತಹ ಸ್ಥಳಗಳಲ್ಲಿ ಕಂಡುಬರುವ ದೊಡ್ಡ ಅಪಾಯವೆಂದರೆ ನೀರಿನಲ್ಲಿ ಧಾರಾಳ ಬಿದ್ದಿರುವ ಒಡೆದ ಗಾಜಿನ ಬಾಟಲಿಗಳ ಚೂರುಗಳು. ಮಕ್ಕಳ ಪಾಲಿಗಂತೂ ಮರಣಾಂತಿಕ.

ನಿಮ್ಮದೊಂದು ಉತ್ತರ

Fill in your details below or click an icon to log in:

WordPress.com Logo

You are commenting using your WordPress.com account. Log Out /  ಬದಲಿಸಿ )

Twitter picture

You are commenting using your Twitter account. Log Out /  ಬದಲಿಸಿ )

Facebook photo

You are commenting using your Facebook account. Log Out /  ಬದಲಿಸಿ )

Connecting to %s